కారణాలు వెతుక్కుంటాం.. కఠిన నిర్ణయాలు తప్పవు: హార్దిక్ పాండ్యా

ఐపీఎల్ 2026లో ముంబై ఇండియన్స్ ఓటముల పరంపర కొనసాగుతోంది. సొంత మైదానం వాంఖడే స్టేడియంలో గురువారం పంజాబ్ కింగ్స్‌తో జరిగిన మ్యాచ్‌లోనూ ఆ జట్టు ఓటమి పాలైంది. ఈ సీజన్‌లో ముంబైకి ఇది వరుసగా నాలుగో పరాజయం. మ్యాచ్ అనంతరం కెప్టెన్ హార్దిక్ పాండ్యా మాట్లాడుతూ తమ వైఫల్యాలపై సమీక్షించుకోవాల్సిన అవసరం ఉందని, ఎక్కడ తప్పు జరుగుతుందో తేల్చుకోవాలని అన్నాడు.

ఈ మ్యాచ్‌లో తొలుత బ్యాటింగ్ చేసిన ముంబై ఇండియన్స్, క్వింటన్ డి కాక్ అద్భుత శతకంతో (60 బంతుల్లో 112 నాటౌట్) భారీ స్కోరు సాధించింది. అతడికి నమన్ ధీర్ (31 బంతుల్లో 50) కూడా తోడవడంతో నిర్ణీత 20 ఓవర్లలో 195/6 పరుగులు చేసింది. అయితే, ఈ లక్ష్యాన్ని పంజాబ్ కింగ్స్ సునాయాసంగా ఛేదించింది. ప్రభ్‌సిమ్రన్ సింగ్ (39 బంతుల్లో 80 నాటౌట్), శ్రేయాస్ అయ్యర్ (35 బంతుల్లో 66) మెరుపు ఇన్నింగ్స్‌లతో మరో 21 బంతులు మిగిలి ఉండగానే 198/3 స్కోరుతో పంజాబ్ ఘన విజయం సాధించింది.

ఓటమిపై హార్దిక్ మాట్లాడుతూ "నిజం చెప్పాలంటే మాట్లాడటానికి ఏమీ లేదు. మేం ఎక్కడ వెనుకబడుతున్నామో చూసుకోవాలి. అది ఆటగాళ్ల ప్రదర్శనలోనా, జట్టు పరంగానా, లేక ప్రణాళికల్లో లోపమా అనేది తేల్చుకోవాలి" అని నిరాశ వ్యక్తం చేశాడు. పంజాబ్ జట్టు తమ కంటే బ్యాటింగ్, బౌలింగ్, ఫీల్డింగ్‌లో మెరుగ్గా ఆడిందని ప్రశంసించాడు. "కొన్ని కఠినమైన నిర్ణయాలు తీసుకోవాల్సి రావొచ్చు. ఆటగాళ్లు బాధ్యత తీసుకోవాలి" అని హార్దిక్ వ్యాఖ్యానించాడు. ఈ మాటలతో జట్టులో మార్పులు తప్పవనే సంకేతాలు ఇచ్చాడు.